நீங்கள் தேடியது "மெகா கூட்டணி"

பாட்னா:

பாராளுமன்ற தேர்தலில் 40 தொகுதிகளை கொண்டுள்ள பீகார் மாநிலம் முக்கிய பங்கு வகிக்கிறது. இங்கு ஆளும் கட்சியாக உள்ள நிதிஷ் குமாரின் ஐக்கிய ஜனதாதளமும், பாரதீய ஜனதா கட்சியும், ராம்விலாஸ் பஸ்வானின் லோக் ஜனசக்தியும் கூட்டணி அமைத்து போட்டியிடுகின்றன.

இந்த கூட்டணிக்கு சரியான போட்டியை ஏற்படுத்துகிற விதத்தில் லாலு பிரசாத்தின் ராஷ்ட்ரீய ஜனதாதளம், காங்கிரஸ், ராஷ்ட்ரீய லோக்சமதா, இந்துஸ்தானி அவாம் மோர்ச்சா (மத சார்பற்றது), விகாஷீல் இன்சான் கட்சிகள் மெகா கூட்டணி அமைத்து போட்டியிடுகின்றன.

இந்த கட்சிகள் இடையே நேற்று தொகுதி உடன்பாடு ஏற்பட்டது.

மொத்தம் உள்ள 40 இடங்களில் லாலு பிரசாத்தின் ராஷ்ட்ரீய ஜனதாதளம் 20 தொகுதிகளில் போட்டியிடுகிறது. காங்கிரஸ் கட்சிக்கு 9 தொகுதிகள் தரப்பட்டுள்ளன.

உபேந்திர குஷ்வாஹாவின் ராஷ்ட்ரீய லோக்சமதா கட்சிக்கு 5 இடங்கள் ஒதுக்கப்பட்டுள்ளன. ஜித்தன் ராம்மஞ்சி தலைமையிலான இந்துஸ்தானி அவாம் மோர்ச்சா (மத சார்பற்றது) கட்சிக்கு 3 தொகுதிகளும், முகேஷ் சானியின் விகாஷீல் இன்சான் கட்சிக்கு 3 இடங்களும் தரப்பட்டுள்ளன.

இந்திய கம்யூனிஸ்டு கட்சி (மார்க்சிஸ்ட்-லெனினிஸ்டு) கட்சிக்கு ராஷ்ட்ரீய ஜனதாதளம் கட்சி தனது தொகுதிகளில் இருந்து ஒரு தொகுதியை ஒதுக்கித்தருகிறது.

காங்கிரசுக்கு மாநிலங்களவை இடம் ஒன்றும் தரப்படுவதாக அறிவிக்கப்பட்டுள்ளது.

முன்னாள் மத்திய மந்திரி சரத் யாதவ், ராஷ்ட்ரீய ஜனதாதளம் கட்சி சின்னத்தில் போட்டியிடுவார். தேர்தலுக்கு பின்னர் அவர் தனது லோக்தந்திரிக் ஜனதாதளம் கட்சியை ராஷ்ட்ரீய ஜனதாதளம் கட்சியுடன் இணைக்க ஒப்புக்கொண்டுள்ளார்.

இடது சாரி கட்சிகளுக்கு இந்த கூட்டணியில் இடம் தரப்படவில்லை. இது அதிர்ச்சி அளிப்பதாக அமைந்துள்ளது என்று இந்திய கம்யூனிஸ்டு கட்சியின் தேசிய பொதுச்செயலாளர் சுதாகர் ரெட்டி கூறி உள்ளார்.

புதுடெல்லி:

பாராளுமன்றத்துக்கு அடுத்த ஆண்டு (2019) ஏப்ரல், மே மாதங்களில் தேர்தல் நடைபெற உள்ளது.

இதற்கான தேர்தல் தேதி இன்னும் 2 மாதங்களில் அறிவிக்கப்பட உள்ளது.

கடந்த 2014-ம் ஆண்டு நடந்த பாராளுமன்றத் தேர்தலின்போது வரலாறு காணாத அளவுக்கு தோல்வியைத் தழுவிய காங்கிரஸ் கட்சி அடுத்தடுத்து சில முக்கிய மாநிலங்களையும் இழந்தது. இதைத் தொடர்ந்து தனித்துப் போட்டியிட்டு பா.ஜ.க.வை வீழ்த்த இயலாது என்பதை உணர்ந்த காங்கிரஸ் தலைவர்கள் மெகா கூட்டணியை உருவாக்க முடிவு செய்தனர்.

இந்த நிலையில் மாநிலங்களில் வலுவாக உள்ள பெரும்பாலான கட்சிகள் பா.ஜ.க.வுக்கு எதிராக மாறின. அது மட்டுமின்றி கடந்த தேர்தலில் பா.ஜ.க. கூட்டணியில் முக்கியஅங்கம் வகித்த சில கட்சிகளும் பா.ஜ.க.விடம் இருந்து விலகி காங்கிரசின் தலைமையை ஏற்க முன் வந்துள்ளன. இதன் காரணமாக பா.ஜ.க.வுக்கு எதிராக அனைத்து எதிர்க் கட்சிகளும் ஓரணியில் ஒன்று திரண்டுள்ளன.

பா.ஜ.க.வை வீழ்த்த எதிர்க் கட்சிகள் அனைத்தையும் ஒரே குடையின் கீழ்கொண்டு வரும் திட்டத்தில் காங்கிரசை விட தெலுங்குதேசம் கட்சித் தலைவர் சந்திரபாபு நாயுடுக்குத் தான் வெற்றி கிடைத்துள்ளது. ஆந்திராவுக்கு சிறப்பு மாநில அந்தஸ்து அளித்து, கூடுதல் நிதி தராததால் கோபம் அடைந்த சந்திரபாபு நாயுடு பா.ஜ.க. கூட்டணியில் இருந்து விலகி, இந்த மெகா கூட்டணியை உருவாக்கி உள்ளார். பா.ஜ.க.வை தோற்கடித்தே தீர வேண்டும் என்ற ஒரே இலக்குடன் அவர் காங்கிரசுடன் கை கோர்த்துள்ளார்.

அது மட்டுமின்றி அனைத்துக் கட்சித் தலைவர்களையும் சந்தித்துப் பேசி மெகா கூட்டணிக்குள் கொண்டு வந்தார். கடந்த மாதம் 22-ந்தேதியே எதிர்க்கட்சிகள் கூட்டத்தை பிரமாண்டமாக நடத்த ஏற்பாடு செய்தார். ஆனால் 5 மாநில தேர்தல் பிரசாரம் காரணமாக அந்த கூட்டம் ஒத்தி வைக்கப்பட்டது.

5 மாநில தேர்தல் முடிந்து நாளை முடிவுகள் வெளிவர இருக்கும் நிலையில் இன்று (திங்கட்கிழமை) எதிர்க்கட்சிகள் பங்கேற்கும் ஆலோசனைக் கூட்டத்துக்கு ஏற்பாடு செய்யப்பட்டுள்ளது. பாராளுமன்ற இணைப்புக் கட்டிடத்தில் உள்ள அரங்கில் இன்று பிற்பகல் 3 மணிக்கு இந்த ஆலோசனைக் கூட்டம் நடக்கிறது.

இந்த கூட்டத்தில் கலந்து கொள்ளும்படி 14 கட்சித் தலைவர்களுக்கு சந்திரபாபு நாயுடு அழைப்பு விடுத்துள்ளார்.

அந்த 14 கட்சிகள் விபரம் வருமாறு:-

1. காங்கிரஸ்

2. திமுக

3. தெலுங்கு தேசம்

4. திரிணாமுல் காங்கிரஸ்

5. தேசியவாத காங்கிரஸ்

6. பகுஜன் சமாஜ்

7. சமாஜ்வாதி

8. ராஷ்டீரிய ஜனதா தளம்

9. இந்திய கம்யூனிஸ்டு

10. மார்க்சிஸ்ட் கம்யூனிஸ்டு

11. ஆம்ஆத்மி

12. தேசிய மாநாட்டு கட்சி

13. மதச்சார்பற்ற

14. லோக் தந்திரிக் ஜனதா தளம் (சரத்யாதவ் கட்சி)

எதிர்க்கட்சிகளின் மெகா கூட்டணியில் முக்கிய அங்கம் வகிக்கும் தி.மு.க. தலைவர் மு.க.ஸ்டாலின் முதல் நபராக நேற்று டெல்லி சென்றார். காங்கிரஸ் மூத்த தலைவர் சோனியா, தலைவர் ராகுலை சந்தித்துப் பேசினார். சோனியாவுக்கு பிறந்த நாள் வாழ்த்து தெரிவித்த அவர் 16-ந்தேதி நடைபெறும் கருணாநிதி சிலை திறப்பு விழாவில் கலந்து கொள்ள வருமாறு அழைப்பு விடுத்தார்.

மு.க.ஸ்டாலினை தொடர்ந்து நேற்று மாலை திரிணாமுல் காங்கிரஸ் தலைவர் மம்தா பானர்ஜி டெல்லி சென்றார். இன்று காலை மற்ற முக்கிய கட்சிகளின் தலைவர்கள் டெல்லி சென்றனர். பகுஜன் சமாஜ் கட்சித் தலைவர் மாயாவதி இன்றைய கூட்டத்தில் பங்கேற்கவில்லை. அவருக்கு பதில் சத்தீஷ் சந்திரா மிஸ்ரா கலந்து கொள்வார் என்று அறிவிக்கப்பட்டுள்ளது.

பா.ஜ.க.வை வீழ்த்த ஒன்று திரண்டுள்ள 14 கட்சிகளின் தலைவர்கள் இன்று தான் முதன் முதலாக ஒன்று சேர்ந்துள்ளனர். இந்த கூட்டத்தில் பா.ஜ.க. ஆட்சிக்கு முடிவு கட்ட இதுவரை இல்லாத அளவுக்கு மெகா கூட்டணிக்கான அடிக்கல் நாட்டப்படுகிறது. 2019-ம் ஆண்டு பாராளுமன்ற தேர்தலில் 14 எதிர்க்கட்சிகளும் ஓரணியில் நிற்கவும், மாநிலங்களுக்கு ஏற்ப கூட்டணியில் தொகுதி பங்கீடுகளை செய்து கொள்ளவும் முடிவு செய்யப்படுகிறது.

அதோடு ஒவ்வொரு மாநிலத்திலும் பா.ஜ.க.வை தோற்கடிக்க, எத்தகைய திட்டங்களை நடைமுறைப்படுத்துவது என்ற வியூகம் குறித்தும் இன்றைய ஆலோசனைக் கூட்டத்தில் தலைவர்கள் விவாதிக்க உள்ளனர். இந்த வியூகம்தான் பா.ஜ.க.வை வீழ்த்தும் மிக முக்கியமான ஆயுதமாக இருக்கும் என்று அரசியல் வட்டாரத்தில் பேசப்படுகிறது.

மாநிலங்களில் செல்வாக்கு மிக்க அனைத்து எதிர்க்கட்சிகளும் ஒருமித்த கருத்துடன் ஒரே இடத்துக்கு வந்து இருப்பதால் இது பா.ஜ.க.வுக்கு மிகப்பெரும் சவாலாக இருக்கும்.

ராகுலை முன் நிறுத்தினால் வெற்றி பெற இயலுமா? என்ற சந்தேகம் நிலவுகிறது. இதைத் தொடர்ந்து பிரதமர் வேட்பாளர் யார் என்பதை இப்போது முடிவு செய்ய வேண்டாம் என்று எதிர்க்கட்சித் தலைவர்கள் தீர்மானித்துள்ளனர். தேர்தல் முடிந்து கட்சிகள் பெறும் வெற்றிகளின் அடிப்படையில் மத்திய மந்திரி சபையை அமைக்கலாம் என்று எதிர்க்கட்சி தலைவர்கள் ஒருமித்த கருத்துக்கு வந்துள்ளனர்.

பாராளுமன்ற தேர்தல் முடிந்த பிறகு தேவைப்பட்டால் பிஜு ஜனதா தளம், சிவசேனா உள்ளிட்ட கட்சிகளிடமும் ஆதரவை கேட்டு பெறும் வியூகத்தையும் எதிர்க்கட்சித் தலைவர்கள் வகுத்துள்ளனர். இன்றைய கூட்டத்தில் இந்த வியூகங்களுக்கு இறுதி வடிவம் கொடுக்கப்பட உள்ளது.

அதை சுட்டிக்காட்டும் வகையில் எதிர்க்கட்சிகளின் ஒருங்கிணைந்த தீர்மானங்கள் கூட்டத்தில் கொண்டு வந்து நிறைவேற்றப்பட்டு வெளியிடப்படும் என்று எதிர் பார்க்கப்படுகிறது. #ParliamentElection #Congress #DMK #BJP

சென்னை:

அடுத்த ஆண்டு நடைபெற உள்ள பாராளுமன்ற தேர்தலுக்கு இன்னும் சில மாதங்களே உள்ளன.

மத்தியில் உள்ள பா.ஜனதா அரசு, பணமதிப்பு நீக்க நடவடிக்கைக்கு பின்னர் செயல் இழந்து விட்டதாக எதிர்க்கட்சிகள் தொடர்ந்து குற்றம் சாட்டி வருகின்றன. கடந்த பாராளுமன்ற தேர்தலில் நாடு முழுவதும் வீசிய மோடி அலையே பா.ஜனதா கட்சிக்கு வெற்றியை தேடித்தந்தது. தற்போது அதுபோன்ற சூழல் எதுவும் இல்லை.

இதனை சாதகமாக பயன்படுத்தி மோடி அரசை வீழ்த்துவதற்கு காங்கிரஸ் காய் நகர்த்தி வருகிறது. அக்கட்சியின் தலைவர் ராகுல்காந்தி அதற்கான முயற்சிகளை முன்னெடுத்து வருகிறார். அகில இந்திய அளவில் காங்கிரஸ் தலைமையில் மாநில கட்சிகள் ஒருங்கிணைந்து மிகப்பெரிய கூட்டணி உருவாகும் சூழல் ஏற்பட்டுள்ளது.

தமிழகத்திலும் பா.ஜனதாவுக்கு எதிராக அரசியல் கட்சிகள் களம் இறங்கி உள்ளன. ஜெயலலிதா மறைவுக்கு பிறகு உருவான எடப்பாடி பழனிசாமி தலைமையிலான அரசையும் எதிர்க்கட்சிகள் பலமாக விமர்சித்து வருகின்றன.

தி.மு.க. தலைவராக பொறுப்பேற்றதும் மு.க.ஸ்டாலின் பொதுக்குழு கூட்டத்திலேயே பா.ஜனதா கட்சிக்கு எதிராக கடுமையாக முழங்கினார். நாடு முழுவதும் காவி வண்ணத்தை அடிக்க நினைக்கும் மோடி அரசை வீட்டுக்கு அனுப்புவோம் என்று ஆவேசமாக குரல் எழும்பினார்.


இதனை கருத்தில் கொண்டு, பா.ஜனதா, அ.தி.மு.க. ஆகிய 2 கட்சிகளுக்கும் எதிராக வலுவான மெகா கூட்டணியை ஏற்படுத்த மு.க.ஸ்டாலின் முடிவு செய்துள்ளார். தி.மு.க. தலைமையிலான இந்த கூட்டணியில் காங்கிரஸ், ம.தி.மு.க. விடுதலை சிறுத்தைகள், இந்திய கம்யூனிஸ்டு, மார்சிஸ்டு கம்யூனிஸ்டு, இந்திய யூனியன் முஸ்லிம் லீக், மனிதநேய மக்கள் கட்சி உள்ளிட்ட கட்சிகள் இடம் பெற உள்ளன. இது தவிர மேலும் சில கட்சிகளையும் ஒருங்கிணைத்து கூட்டணியை பலமாக்க தி.மு.க. திட்டமிட்டுள்ளது.

பாராளுமன்ற தேர்தலில் அமைக்கும் இந்த கூட்டணியை அப்படியே கொண்டு சென்று சட்டமன்ற தேர்தலிலும் வெற்றி பெற்று விடலாம் என்றே தி.மு.க. கணக்கு போட்டுள்ளது.

கருணாநிதியின் மறைவுக்கு பிறகு தலைவராகி உள்ள மு.க.ஸ்டாலினுக்கு கூட்டணி கட்சிகளை ஒருங்கிணைத்து கொண்டு செல்ல வேண்டிய கட்டாயம் ஏற்பட்டுள்ளது.

தேர்தல் நேரத்தில் தொகுதி எண்ணிக்கையால் ஏற்படும் முறிவே பல நேரங்களில் கூட்டணிகளை சுக்கு நூறாக்கி உள்ளது. சவாலான அந்த பணியை மு.க.ஸ்டாலின் எப்படி மேற்கொள்ளப் போகிறார்? என்ற மிகப்பெரிய எதிர்பார்ப்பை ஏற்படுத்தி உள்ளது.

புதிய தலைவரான மு.க.ஸ்டாலினுக்கு ஆதரவாக இருப்போம் என்று காங்கிரஸ் கட்சி தெரிவித்துள்ளது.

மற்ற கட்சிகளும் அவருக்கு தங்களது ஆதரவை தெரிவிக்க வேண்டும் என்று காங்கிரஸ் கட்சியின் மூத்த தலைவரான குலாம் நபி ஆசாத் அழைப்பு விடுத்துள்ளார். இது அமைய உள்ள தி.மு.க.-காங்கிரஸ் கூட்டணியில் மற்ற கட்சிகளை சேர்வதற்கு விடுத்த அழைப்பாகவே கருதப்படுகிறது.

பீகார் முதல்-மந்திரி நிதிஷ்குமார் பேசும் போது, தலைவராக பொறுப்பேற்றுள்ள மு.க.ஸ்டாலினுக்கு பல பொறுப்புகள் உள்ளன. கருணாநிதியின் எண்ணங்களை, லட்சிய கனவுகளை அவர் நிறைவேற்றுவார் என்று கூறினார்.

தேசியவாத காங்கிரஸ் கட்சியின் பொதுச் செயலாளரான பிரபுல் பட்டேல் கூறும்போது, மு.க.ஸ்டாலின் கருணாநிதி காட்டிய சாதனை பாதையையும், மக்கள் நல பணியையும் தொடர வேண்டும் என்று கேட்டுக் கொண்டார்.

திரிணாமூல் காங்கிரஸ் எம்.பி. டெரிக் ஓ.பிரைன் பேசும்போது, பா.ஜனதா ஆட்சிக்கு முடிவு கட்டி டெல்லி பாராளுமன்றத்தையும் நாம் கைப்பற்ற வேண்டும். இதற்காக தி.மு.க. தலைமையிலான கூட்டணி தமிழகத்தில் 40 தொகுதிகளில் வென்று சாதிக்க வேண்டும்.

மேடையில் இருக்கும் அனைவரும் பா.ஜனதாவுக்கு எதிராக கூட்டணியை அமைக்க வேண்டும் என்றும் வலியுறுத்தினார்.

கூட்டத்தில் பேசிய தேசிய தலைவர்கள் பலரும், பா.ஜனதாவுக்கு எதிராக அணி திரள வேண்டும் என்பதை மையமாக வைத்தே பேசினர். இதன் மூலம் தமிழகத்தில் மட்டுமின்றி தேசிய அளவிலும் பா.ஜனதாவுக்கு எதிராக வலுவான கூட்டணி அமைவது 100 சதவீதம் உறுதியாகியுள்ளது.

இது பாராளுன்ற தேர்தலில் பா.ஜனதாவுக்கு நிச்சயம் சவாலாகவே இருக்கும். அதனை அந்த கட்சி எப்படி எதிர்கொள்ளப்போகிறது என்பது மிகப்பெரிய கேள்வியாக உருவெடுத்துள்ளது. #DMK #MKStalin